کاریگەریی هایدرۆجین سەڵفاید (H₂S) لەسەر پیشەسازیی نەوت

کۆلێژی ئەندازیاری – بەشی ئەندازیاری نەوت لە زانکۆی نۆڵج، وۆرکشۆپێکی زانستی بە ناونیشانی «کاریگەریی هایدرۆجین سەڵفاید (H₂S) لەسەر پیشەسازیی نەوت» ڕێکدەخات.

ئەم وۆرکشۆپە لەلایەن پ.ی. قاسم یەحیا محەمەد پێشکەش دەکرێت و تیشک دەخاتە سەر تایبەتمەندییە کیمیایی و فیزیاییەکانی گازی هایدرۆجین سەڵفاید (H₂S)، سەرچاوەکانی دروستبوونی لە پرۆسەکانی بەرهەمهێنان و پالایشکردنی نەوت و گاز، هەروەها کاریگەرییە تەکنیکی، ژینگەیی و تەندروستییەکانی لەسەر پیشەسازیی نەوت.

لە ماوەی وۆرکشۆپەکەدا، مەترسییەکانی پەیوەست بە بوونی H₂S لە کێڵگە و دامەزراوە نەوتییەکان، کاریگەرییەکانی لەسەر کەرەستە و ئامێرە پیشەسازییەکان، هەروەها ڕێکار و تەکنیکە نوێکانی چاودێریکردن، پێوانەکردن و کۆنترۆڵکردنی ئەم گازە زیانبەخشە دەخرێنەڕوو.

هەروەها، گرنگیی جێبەجێکردنی ستانداردەکانی سەلامەتی و ڕێوشوێنە پێویستەکانی پاراستنی کارمەندان و ژینگە لە شوێنەکانی بەرهەمهێنان و پرۆسەکردنی نەوت باس دەکرێت.

ڕێکخستنی ئەم وۆرکشۆپە بەشێکە لە چالاکییە زانستی و ئەکادیمییەکانی بەشی ئەندازیاری نەوت، بە مەبەستی گەشەپێدانی زانیاریی زانستی و تواناکانی فێرخوازان و مامۆستایان و بەستنەوەی زانیاریی تیۆری بە کێشە و داواکارییە پراکتیکییەکانی کەرتی نەوت و گاز.